تبلیغات
آذربایجان قیزلاری
شنبه 2 اردیبهشت 1391

آذربایجان قیزی یام

   نوشته شده توسط: ش س    

شیرین دیللی ، گؤزل ، دادلی ، صفالی

 

محبت لی ، صداقت لی ، وفالی

 

باخیشلاری ، ناز ائدیشی  شفالی

 

                             گؤزل اوزلو آذربایجان قیزی یام

 

                             دنیزلرین عشوه سی یم ، نازی یام

شعر : م . ن


یکشنبه 3 اردیبهشت 1391

خان گله جق

   نوشته شده توسط: ش س    

                              بسم الله الرحمن الرحیم                                                                                       

 

اورگیمدن گؤزومه بو گئجه مهمان گله جق

                                        مهربانلیق باریشیق اؤلكه سینه خان گله جق                                                                                                                                                                                                                                                                                                                            

 

فلج اولموش جانیما یالواریرام دوام گتیر

                                        بوگئجه دوست آداسیندان جانیما جان گله جق   

 

شمعی سؤنموش گؤزومو باغلایاراق اومودلویام

                                        درد الیندن كوله دؤنموش دامارا قان گله جق   

 

بو گئجه بس كی فراقت سؤزونو سؤیله میشم

                                                آئله م باش گؤتوروب یولداشا قوربان گله جق

 

باشی آلچاق نه قَدَر یخْلامیشام اوتانماقی            

                                                خبر اولسون بو گئجه وارلیغیما شان گله جق

 

آللاهیم تك دیله ییم یار بو گئجه یوبانماسین    

                                                یوخسا كنعانه قَدَُر جانیما طوفان گله جق

 

قوجا قارقا قوروموش گوللریمی راحات براخ

                                                جان ائویندن جانا بولبول له گولوستان گله جق

 

داهی قورخمام بیری تولكو یا بیری قورد اولاجاق

                                                نیه كی عشقق آداسیندان بورا اصلان گله جق

 

آللاهیم یالواریرام صوبحه قَدَر ساقلا منی 

                                                اله دوشمز گئجه دی یانیما كامران گله جق

 

حتی بیر داملا محبت گؤره مزدیم بیر عؤمور

                                                یاخچیلیق دان شوكور اولسون منه كاروان گله جق

 

او بیر اینساندی كی دوشسه دارا بیر كس ، دادینا

                                                بوتون ائللر دوشونوب كی شمزنِیان گله جق

 

آتاسینا آناسینا كمك اول ای یارادان

                                                اونو گؤرسه گؤزو ، هر كافره ایمان گله جق

 

میثمی قوربان ائد او دوستاكی سئودا چاغیریر

                                                بئله دوستون یانینا هر گئجه قرآن گله جق

 

بو شعری جان یولداشیم ، عزیز قارداشیما و هابئله بوتون آذربایجان ائلینه سونورام؛

 

                                                            شعر:  م . ن  18/8/1386


سه شنبه 30 فروردین 1390

گلمه دیز

   نوشته شده توسط: ش س    

گئجه گوندوز گؤز تیکمیشم یوللارا

                                                آیلار گئچدی ایله دؤندو گلمه دیز

 

پاییز گچدی ایل دولاندی اولدو یاز

گؤز یاشلاریم سئله دؤندو گلمه دیز

 

باهار گلیر یاشیللانیر بو چؤللر

باغلاردااوخویور شیدا بولبوللر

 

بیربیرینه قاریشیبدی بو سئللر

آخدی آراز لیله دؤندو گلمه دیز

 

آیریلیغین توخومون کیم اکیبدی

هانسی آنا بالادان ال چکیبدی

 

کنعان جانیم یوسفه گؤز تیکیبدی

اگیلدی قامتیم تئله دؤندو گلمه دیز

 

علی عابدینی


سه شنبه 30 فروردین 1390

سالمان عمی

   نوشته شده توسط: ش س    

شعر : م . ن

 

سالمان عمی بیر چالیشان اینساندیر

 

هر سؤزونو حق دانیشان اینساندیر

 

اولاد اَلیندَن یاپیشان اینساندیر

 

                                     تانری اوْنون جانینا هیچ دَیمَه سین

 

                                     بوندان آرتیق قامَتینی اَیمَسین

 

 

بیر گون مَنی چمنلیكدَن چاغیردی

 

یوْرولموشدو تَر اوزوندَن یاغیردی

 

گولدار عَممه اینَك لَری ساغیردی

 

                                                    بایرامیدی ائل گَزیردی ائلینی

 

                                                    اَكین اوچون باغلییریدی بئلینی

 

 

دوواردان بیر مَنه ساری باخ دئدی

 

ایشلییَن اوْل شیطانی وور یاخ دئدی

 

ایش پالتارین تیز اینینه تاخ دئدی

 

                                        دئدیم وئردیم سؤزلَرینه قولاغی

 

                                       آخیرد گَلسین اوره كدَه كی بولاغی

 

 

دئدی اوغول پهین سرماقدیر ایشیم

 

آرابانی توم دوْلدورماقدیر ایشیم

 

یولا دوشوب یئره سورماقدیر ایشیم

 

                                              پهین لری من دوْلدورم سن آپار

 

                                              توپراق اوزو پهینیله گوج تاپار

 

 

هر آرابا اوتوز تومَن سالاجاق

 

اوندان سونرا یاخچی لیقین قالاجاق

 

دئدیم اولسون كیم سَندَن پول آلاجاق ؟

 

                                           سئوگی لَرلَه ایشیمی زی باشلادیق

 

                                           كَدَر ایتین قلبیمیزدَن داشلادیق

 

 

او آرادا آچدی اوره ك سؤزونی

 

دئدی مَنَه كچلیگینین دوزونی

 

ساقلامادی مَنیم كیمی اؤزونی

 

                                      اوشاقلیقین ، ایگیدلیگین دانیشدی

 

                                      غَمَه دوْلدوُم قلبیم یاندی آلیشدی

 

 

گئچلیگینده دئدی نه لر اولموشدو

 

بیلله نیردی آلا گؤزلر دوْلموشدو

 

آتا ، آنا  ایكی گول كی سوْلموشدو

 

                                          منََه دئدی یتیم قالماق بؤیله دی

 

                                          اوشاقلیقدا چكدیكلرین سؤیله دی

 

 

بؤیویونجاق چوق كورلوقلار چَكمیشدی

 

اوره گینده ، نه نیسگیللَر اَكمیشدی

 

نه گؤزیاشلار حسرتیله تؤكموشدی

 

                                          دئدی داوار آلیب چؤلده یایماقدان

 

                                          سایسیز گئچه ن قاراگونو سایماقدان

 

 

او آناسیز اؤزی آلما سویارمیش

 

چتین بیرگؤن یییب قارنی دوْیارمیش

 

جاوانلیقدا جیبه صابین قوْیارمیش

 

                                        آچدی دئدی عشق ایچینده قالماقدان

 

                                        اَرباب گؤروب باش آشاقی سالماقدان

 

 

ایندی بیلدیم نیه منه دئیب سن

 

منیم كیمی سَنْده پالاس گئیب سن

 

چوره گینی یاوان یاوان یئیب سن

 

                                       سن ایسته دین بوقانونو بیلَم من

 

                                       مایوس لوغو اوره گیمدن سیلَم من

 

 

قَدْریمیزی دیری زامان كیم بیلیر ؟

 

خوْش حالداییق یادا یامان كیم بیلیر ؟

 

فلك بیزه وئرمیر آمان كیم بیلیر ؟

 

                                         اونداكی بیز اؤلدوق گئتدیق آغلیرلار

 

                                          نه فایداكی بیر اؤلموشو ساغلیرلار

 

 

بو دونیا دا قالاجاق تك آدیمیز

 

یایاخچی لیق یادا پیسلیق یادیمیز

 

اوره كلرده آجی شیرین دادیمیز

 

                                       سالمان عمی مردده ن اوْلان  مرد اولار

 

                                       بیر اینسانی مرد ایلییه ن ، درد اولار

 

 

آیریلیق لار اینسانلاری ووراندا

 

شیطان مردین باشی اؤسته دوراندا

 

مرد یوْلوندا نامرد تَلَه قوراندا

 

                                    سالمان عمی سَنین ائلین یاشاسین

 

                                    بیر بیرینه محببَت لر داشاسین


دوشنبه 29 فروردین 1390

یاز گله جک

   نوشته شده توسط: ش س    

غم ایله مه شیدا بولبول

اؤلکه میزه یازگله جک

گون ووروب بوزلار سیناجاق

دسته دسته قاز گله جک

 

قایادان کهلیک اوچاجاق

داغلاردا جیران قاچاجاق

شیدا بولبول دیل آچاجاق

عشوه غمزه ناز گله جک

 

گؤزل لر دوشسون اویونا

یار یولداش باخسین بویونا

هر بیر سوبایین تویونا

کامان قاوال ساز گله جک

 

یکانلی علی غم یولداشین

قانه دوندردی گؤز یاشین

اگیلیبدی یاریم ارشین

ایشین چتین دوز گله جک

 

شعر :علی عابدینی (آشیق علی یکانلی)


یکشنبه 28 فروردین 1390

محبت

   نوشته شده توسط: ش س    

محبْبَتین گؤزون توتما قوْی باخسین

 

آخار سویا مانیع اولما قوْی آخسین

 

ایلدیریمین حیكمتی وار ، قوْی چاخسین

 

گؤی یاغمازسا توپراقیلا باریشماز

 

محببت سیز ، اینسان ائله قاریشماز

 

شعر : م . ن


یکشنبه 28 فروردین 1390

درین دره 1

   نوشته شده توسط: ش س    

شعر: م . ن

 

درین دَرَدَه بیر چوبان واریمیش

 

جانینن سئوَر بیر ایت اونا یاریمیش

 

او چوبان بیر سورو داوار یایارمیش

 

بیر آغاجلا دال دالا دایارمیش

 

بیر قورد گَلیب هر گون بیرین ییَرمیش

 

چوبان ایته گَل بیز قاچاق دییَرمیش

 

قوْیون لارین بیر نئچه سی قاچارمیش

 

قالانی سؤز یالوارماقدان آچارمیش

 

قورد بوغارمیش قالانلارین نئچه سین

 

بیرین یییب ، خوش ائدَرمیش گئجه سین

 

اؤلدوردوغی او بیریلَر قالارمیش

 

تَك بیرینین سوموگونو یالارمیش

 

آچارمیش او اوره گینین آراسین

 

ییَرمیش تَك اَتینین بیر پاراسین

 

او گئدرمیش گَلَرمیش لَر قالانلار

 

دئمَزمیش لَر گؤرنَه اوْلوب تالانلار

 

آچارمیش لار او آچیلماز گؤزلَری

 

دِیَرمیش لر هر بیری بو سؤزلَری

 

« آیاق چالین دای باشلانسین اوْیون لار

 

اوتارماقا یئر آچیلدی ، قویون لار ! »

 

چوبان چیخیب او دَرَیَه باخارمیش

 

قورد گئدَنده ایلدیریم تَك چاخارمیش

 

« دور گَل ایتیم دَرَمیزه گئداق بیز

 

یاشایشا گؤزل دَوام ائداق بیز

 

نئچه قوْیون قالیب یئرده یئماقا

 

قورد بوْغوبدی ، سؤز قالمییب دئماقا »

 

آردینی گؤزله و ایزله...


یکشنبه 28 فروردین 1390

درین دره 2

   نوشته شده توسط: ش س    

قوْیون لارین اوره كْلَرین دَلَرْمیش

 

بیر گون سونرا گئنه ده قورد گَلَرمیش

 

چوْبان لا ایت دیرماشارمیش لار داغا

 

قاچا بیلَن قویونلار دا ، سوْل ساقا

 

یئنه اؤیله نئچه قوْیون اؤلورموش

 

تك بیرینین ، قورد سوموگون بؤلورموش

 

گئچَن گوندَن قالان قوْیون قالیرمیش

 

جَمْدَگینی ، آری میلچَك دالیرمیش

 

غیرتسیز لیك او چوْباندا چوْخویموش

 

قویونلاردا ایتده چیخار یوْخویموش

 

بیر گون بیری قوْیونلاردان گؤز آچیر

 

دوستلاریلا عدالَتدَن سؤز آچیر

 

« گلین وئراق اَل اَله بیز چیخاق بیز

 

قوردی ووروب دیزدَن سالاق ، ییخاق بیز

 

هر گون بیزی دَرْدَه سالیر بیلمیریق

 

گؤزلَر گؤرمور ، لكه لَری سیلمیریق

 

چوبان اونا قارشی قورمور ، اؤلوبدور

 

شرافَتین بئلین ووروب بؤلوبدور

 

ایت ده ، اوْنون یوْلون توتوب گئتماقا

 

قوْروماقدان ، چوخ خیانت ائتماقا

 

بیز قوْرخماساق قورد چَكیلَر دَرَدَن

 

آشا بیلمَز سو دایاقْلی بَرَدَن

 

بیرلیغیمیز اوْلسا ، بوردا قالانماز

 

بیر بیر ییخیب ، جانیمزی آلانماز »

 

 

آردینی گؤزله و ایزله...


یکشنبه 28 فروردین 1390

درین دره 3

   نوشته شده توسط: ش س    

باشلارینی آشاقییا سالیرلار

 

اویانماییب قارانلیقدا قالیرلار

 

بیری دئیر « آغریمیر بوباشیمیز

 

قوردا نیلَر ووردوغوموز داشیمیز ؟

 

من كی ساغام ، دَرْدَه سالمام اؤزومی

 

قوردون گؤزونه ، تیكلمَرَم گؤزومی »

 

هر بیریسی بیر طَرَفَه سوزولور

 

"مرد قوْیونون" اَلی آرتیق اوزولور

 

یالنیز قالیر هیچ بیر قوْیون اوْیانمیر

 

ظالیم قوردون قاباغیندا دایانمیر

 

بیر گون چیخیر دورور قوردون یوْلوندا

 

گورور گَلیر نئچه قورد ساق سولوندا

 

دئیر « ظالیم چوخ ظولومْلَر ائدیرسَن

 

قانلار تؤكوب تالان ائدیب گئدیرسَن

 

هر گون بیزیم قاپیمیزی چالیرسان

 

مظلوم لارین جانلارینی آلیرسان

 

آج گؤزلوسَن ، یئماغی لا دوْیمورسان

 

یالوار ساق دا ، قاچاق یولو قوْیمورسان

 

بیزیم اوچون یئتمَزمی بو ظولوملر ؟

 

قورد گَتیردین كی چوخالسین اؤلوم لر

 

بوقوردلاری گؤتور آپار گلمَه دای

 

قویونلارین اوره گینی دَلمَه دای »

 

آردینی گؤزله و ایزله...


یکشنبه 28 فروردین 1390

درین دره 4

   نوشته شده توسط: ش س    

قورد آجییر ، دئیر « حاقدیر سؤزلَرین

 

آما گؤرمور اطرافینی گؤزلَرین

 

قاباغیمدا تَك باشینا دوروبسان

 

اؤز باشینی اؤز الینلَه ووروبسان

 

سن یالنیزسان مَنَه نِیلَر قالخیمین ؟

 

بیر گیله سَن ، گؤستَر هانی سالخیمین ؟

 

بیر داملا سو ، دَنیز سؤزون دانیشیر

 

یاردیمجیسیز دؤیوشماقا چالیشیر»

 

قورد آتیلیر قویونو یئره ییخیر

 

او چابالیر ، قورد تئز اوستونه چیخیر

 

دئیر « سَنی بوْغسام مَنَه خوْش اوْلماز

 

قوْیون یئماق منیم اوچون بوْش اوْلماز

 

هامی دیَیر قورد ظالیم دیر اوْیانین

 

او ظالیمین قاباغیندا دایانین

 

من بوْغماسام منی یاخچی گؤرَرلَر

 

مندن خوْش سؤز بیر بیرینه حؤرَرلَر

 

رحم ائدمَغیم قوْیونلاری آزدیرار

 

سئوگی لیمی اوره كلَرَه یازدیرار

 

اَل قوْلونو، قویروغونو قوْپاررام

 

دوستلارینین یانلارینا آپاررام

 

اونلار سنه گوله جاقلار زامانلار

 

قولاغینا دِیه جاقلار یامانلار »

 

قورد گَمیریر اوْنون اَلین آیاقین

 

اَلدَن آلیر آیاقداكی دایاقین

 

قویروغونو كَسیر وئریر قوردلارا

 

دئیر « دورون گئداق "یاتان یوردلارا"

 

غیرتسیزلر یوردو بیزی گؤزلویور

 

قوْیونلارین جانی بیزی اؤزلویور »

 

آردینی گؤزله و ایزله...


یکشنبه 28 فروردین 1390

درین دره 5

   نوشته شده توسط: ش س    

قورد گؤتورور قوْیونو دَرَه سینه

 

تَپیك وورور دایاقسیز بَرَه سینه

 

اوْ قورد لاری سالیر ائلین جانینا

 

بیر بیر ییغیر مَرد قوْیونون یانینا

 

دئیر « بیر باخ ، غیرتلری داشیبدیر !

 

حئیف كی سو ، باشلاریندان آشیبدیر »

 

دئیر « باخین مرد قوْیونون سوْنونا

 

اَل آیاقین قویاجاغیق خوْنونا ! »

 

قورد بیر نئچه قوْیونلاردان گَبَرْدیر

 

چوبان باخیر دوشونور نه خَبَرْدیر

 

تئز گیزلَنیر ساتقین ایتین یانیندا

 

شَرَف قالمیر بولاندیریق قانیندا

 

قوردلار دوْیوب ، اوْردان چیخیب گئدیلرلَر

 

قویونلار او مرده ظولوم ائدیلرلَر

 

بیری دئیر « گئتمیشدین حاق آلاسان

 

حاققین بودور ایندی چوْلاق قالاسان »

 

هامی اونا ایشكاند ائدیب گولولرلَر

 

اوره گینی پارچالاییب بؤلولرلَر

 

قویون یئرده قارینچ قارینچ سورورور

 

یارالانیر جانی قانا بورونور

آردینی گؤزله و ایزله...


یکشنبه 28 فروردین 1390

درین دره 6 (سون)

   نوشته شده توسط: ش س    

چَتین لَشیر اوْنون اوچون یاشاماق

ائلین دردین اوره گینده داشاماق

كیمسه اوْلمور اونون دردین آنلیا

یوْرقون جانین تاپشیریر اوْ تانریا

اوْنو كیمسه یادا سالمیر دَرَدَه

مردلیق یوْلو آرتیق قالمیر دَرَدَه

قورد اوْنلارین جانلارینا داراشیر

دوزدَن دَه كی بو اوْنلارا یاراشیر

رحم اِیله میر دیلسیزَه دَه كوْرا دا

خوْش گون سورور ایللَر بوْیو اوْرادا

نئچه قوْیون بوْغولاندا اوْیانیر

نه فایدا كی اوْندا قانا بوْیانیر

بیر گون اولور یئرین اوزو جیریلیر

قوْیون قالمیر تَك بَه تَكی قیریلر

دوشور ساتقین چوْبانین قورد جانینا

یئره ییخیب بَلَشدیریر قانینا

اوْ آج قالیب آجیلیق وورور باشینا

ایتی توتوب پئشمان ائدیر یاشینا"

گون اولماسا گئجه سئور چؤكماغی

سوْیوق قانین راحات اوْلار تؤكماغی

بولاق چیخیب بولاقلارا بئل اوْلور

اوْنون سوْنو دؤنولمَز بیر سئل اوْلور

بیر بولاغی ، آیاقلاسان بوْغولار

سئله آما ، آیاق باسان بوْغولار

***

 

بو اومودویلا کی خوشونوزا گئتمیش اولسون

م . ن

 

                  لطفا نظر وئرین